കൂത്താട്ടുകുളം: കൂത്താട്ടുകുളം ഗവൺമെന്റ് ആശുപത്രിയിൽ ആരോഗ്യ മന്ത്രി കെ. മുരളീധരൻ മിന്നൽ സന്ദർശനം നടത്തി. ആശുപത്രിയിലെ ഐസലേഷൻ വാർഡുമായി ബന്ധപ്പെട്ട് ഉയർന്ന അഴിമതി ആരോപണങ്ങളിൽ സമഗ്രമായ അന്വേഷണം നടത്തുമെന്ന് മന്ത്രി വ്യക്തമാക്കി.
ആശുപത്രിയിൽ പോസ്‌റ്റ്‌മോർട്ടം സംവിധാനം പുനഃസ്‌ഥാപിക്കുന്നതിലെ കാലതാമസവും പോരായ്മകളും അടിയന്തരമായി പരിശോധിച്ച് ആവശ്യമായ നടപടികൾ സ്വീകരിക്കുമെന്നും സന്ദർശന വേളയിൽ അദ്ദേഹം ഉറപ്പുനൽകി. ആശുപത്രിയിലെ വിവിധ സൗകര്യങ്ങൾ മന്ത്രി നേരിൽ കണ്ട് വിലയിരുത്തി.
മന്ത്രി അനൂപ് ജേക്കബ്, നഗരസഭാധ്യക്ഷൻ റെജി ജോൺ, വൈസ് ചെയർപഴ്‌സൻ ലിസി ജോസ്, ആരോഗ്യ സ്‌ഥിരസമിതി അധ്യക്ഷൻ പി.സി. ഭാസ്‌കരൻ എന്നിവർ മന്ത്രിക്കൊപ്പമുണ്ടായിരുന്നു. ജനപ്രതിനിധികളും നേതാക്കളുമായ ബിജു ജോൺ, ടി.എസ്. സാറ, മായാ വിശ്വനാഥ്, മർക്കോസ് ഉലഹന്നാൻ, സിബി കൊട്ടാരം, ജോമി മാത്യു, വിൽസൺ കെ.ജോൺ, എം.എ. ഷാജി, ആശുപത്രി സൂപ്രണ്ട് വി.ജെ. ജയമോൾ തുടങ്ങിയവരും സന്ദർശന സംഘത്തിൽ പങ്കെടുത്തു.
