കുമളിയിൽ വാഹന പരിശോധനയ്ക്കിടെ എസ്ഐയ്ക്ക് കോൺഗ്രസ് നേതാവിന്റെ മർദ്ദനം; പ്രതികൾ ഒളിവിൽഇടുക്കി ജില്ലയിലെ കുമളിയിൽ വാഹന പരിശോധനയ്ക്കിടെ സബ് ഇൻസ്പെക്ടർക്കും ഡ്രൈവർക്കും നേരെ കോൺഗ്രസ് നേതാവിന്റെ നേതൃത്വത്തിലുള്ള സംഘത്തിന്റെ മർദ്ദനം. കുമളി എസ്ഐ കണ്ണൻ, അദ്ദേഹത്തിന്റെ ഡ്രൈവർ എന്നിവർക്കാണ് മർദ്ദനമേറ്റത്. സംഭവവുമായി ബന്ധപ്പെട്ട് കുമളി ബ്ലോക്ക് പഞ്ചായത്ത് മെമ്പറും കോൺഗ്രസ് നേതാവുമായ ബിനോയിയും സംഘവും ഒളിവിലാണെന്ന് പോലീസ് അറിയിച്ചു.ഇന്നലെ വൈകുന്നേരം ആറരയോടെ കുമളി വെള്ളാരംകുന്ന് ഭാഗത്ത് വാഹന പരിശോധന നടത്തുകയായിരുന്നു എസ്ഐയും സംഘവും. ഈ സമയം കാറിലെത്തിയ നാലംഗ സംഘത്തെ ബ്രത്ത് അനലൈസർ ഉപയോഗിച്ച് പരിശോധിച്ചപ്പോൾ അവർ മദ്യപിച്ചിട്ടുണ്ടെന്ന് കണ്ടെത്തി. ഇതേത്തുടർന്ന് ഡ്രൈവറെ കസ്റ്റഡിയിലെടുക്കാനും വാഹനം പിടിച്ചെടുക്കാനും പോലീസ് ശ്രമിച്ചു.വാഹനത്തിലുണ്ടായിരുന്ന മറ്റ് മൂന്ന് പേരും മദ്യപിച്ചിരുന്നതിനാൽ, മദ്യപിക്കാത്ത ലൈസൻസുള്ള മറ്റൊരാൾ വന്നാൽ മാത്രമേ വാഹനം വിട്ടുനൽകാൻ കഴിയൂ എന്ന് പോലീസ് നിലപാടെടുത്തു. ഇതിൽ പ്രകോപിതരായ ബിനോയിയുടെ നേതൃത്വത്തിലുള്ള സംഘം എസ്ഐ കണ്ണനെയും ഡ്രൈവറെയും മർദ്ദിക്കുകയായിരുന്നു.മർദ്ദനമേറ്റ പോലീസ് ഉദ്യോഗസ്ഥർ ഇന്നലെ രാത്രി തന്നെ ചികിത്സ തേടി. സംഭവത്തിൽ പോലീസ് എഫ്ഐആർ രജിസ്റ്റർ ചെയ്തിട്ടുണ്ട്. കേസ് എടുത്തതിന് പിന്നാലെ ബിനോയ് ഉൾപ്പെടെയുള്ള പ്രതികൾ ഒളിവിൽ പോയിരിക്കുകയാണ്. പ്രതികൾക്കായി പോലീസ് തിരച്ചിൽ ഊർജിതമാക്കി.
