​കോലഞ്ചേരിയിൽ എസ്‌ബിഐ എടിഎം തകർത്ത് കവർച്ചാശ്രമം; അന്വേഷണം ആരംഭിച്ച് പോലീസ്
​കോലഞ്ചേരി: പുത്തൻകുരിശിൽ എസ്‌ബിഐയുടെ എടിഎമ്മിൽ കവർച്ചാശ്രമം. പുത്തൻകുരിശ് സബ് രജിസ്ട്രാർ ഓഫീസിന് എതിർവശത്ത് കാവനാൽ ബിൽഡിങ്ങിൽ പ്രവർത്തിക്കുന്ന എടിഎമ്മിലാണ് കവർച്ചാശ്രമം ഉണ്ടായത്. മെഷീൻ തകർത്തുവെങ്കിലും പണം നഷ്ടപ്പെട്ടിട്ടില്ല.
​കഴിഞ്ഞ ദിവസം രാത്രിയാണ് സംഭവം നടന്നതെന്നാണ് റിപ്പോർട്ട്. എടിഎമ്മിന്റെ മുൻഭാഗം മുഴുവനായും അഴിച്ചുമാറ്റിയ നിലയിലായിരുന്നു. എന്നാൽ പണം സൂക്ഷിച്ചിരിക്കുന്ന സുരക്ഷിതമായ ഭാഗത്തേക്ക് കടക്കാൻ മോഷ്ടാക്കൾക്ക് കഴിഞ്ഞില്ല. ഇതോടെ ശ്രമം ഉപേക്ഷിച്ച് ഇവർ കടന്നുകളയുകയായിരുന്നു. നല്ല മഴയായിരുന്നതിനാലും കെട്ടിടത്തിന്റെ ഉള്ളിലേക്ക് കയറി എടിഎം ഇരിക്കുന്നതിനാലും രാത്രിയിൽ സംഭവം ആരുടെയും ശ്രദ്ധയിൽപ്പെട്ടില്ല.
​പിറ്റേന്ന് രാവിലെ തൊട്ടടുത്ത് പ്രവർത്തിക്കുന്ന ലോട്ടറിക്കടയിലെ ജീവനക്കാരാണ് എടിഎം തകർത്ത നിലയിൽ ആദ്യം കണ്ടത്. ഇവർ പറഞ്ഞാണ് ബാങ്ക് അധികൃതർ വിവരം അറിഞ്ഞതും തുടർന്ന് പോലീസിൽ വിവരമറിയിച്ചതും.
​വിവരമറിഞ്ഞ് പുത്തൻകുരിശ് പോലീസും വിരലടയാള വിദഗ്ധരും സ്ഥലത്തെത്തി പരിശോധന നടത്തി വിവരങ്ങൾ ശേഖരിച്ചു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. സമീപത്തെ സിസിടിവി ദൃശ്യങ്ങൾ കേന്ദ്രീകരിച്ചാകും അന്വേഷണം പുരോഗമിക്കുക.