പാലാ: വിദ്യാഭ്യാസ, തൊഴിൽ മേഖലകളിൽ ആർട്ടിഫിഷ്യൽ ഇന്റലിജൻസിന്റെ (എ.ഐ.) സാധ്യതകൾ അനുദിനം വർധിച്ചുവരുന്ന സാഹചര്യത്തിൽ വിദ്യാർത്ഥികൾ പുതിയ സാങ്കേതികവിദ്യകളെ ഫലപ്രദമായി പ്രയോജനപ്പെടുത്തണമെന്ന് റബ്ബർ ബോർഡ് ചെയർമാൻ എൻ. ഹരി. പാലാ സെന്റ് തോമസ് ഓട്ടോണമസ് കോളേജിലെ കൊമേഴ്‌സ് വിഭാഗത്തിന്റെ ആഭിമുഖ്യത്തിൽ നടന്ന 2026–27 അധ്യയന വർഷത്തെ കൊമേഴ്‌സ് ഫോറം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പഠനം, ഗവേഷണം, ആശയവിനിമയം, ബിസിനസ് തുടങ്ങിയ വിവിധ മേഖലകളിൽ എ.ഐ. വലിയ മാറ്റങ്ങൾക്ക് വഴിയൊരുക്കുകയാണെന്നും അദ്ദേഹം കൂട്ടിച്ചേർത്തു.
കോളേജ് ഓഡിറ്റോറിയത്തിൽ നടന്ന ചടങ്ങിൽ കൊമേഴ്‌സ് ഫോറം പ്രസിഡന്റ് ആഞ്ചലോ ബിനു അധ്യക്ഷത വഹിച്ചു. രാജ്യത്തിന്റെ സാമ്പത്തിക മേഖലയിൽ ഡിജിറ്റൽ പേയ്മെന്റുകൾ സൃഷ്ടിച്ചുകൊണ്ടിരിക്കുന്ന മാറ്റങ്ങളെക്കുറിച്ചും ഡിജിറ്റൽ ഇടപാടുകളുടെ പ്രാധാന്യത്തെക്കുറിച്ചും കോളേജ് പ്രിൻസിപ്പൽ പ്രൊഫ. ടോജി തോമസ് മുഖ്യപ്രഭാഷണം നടത്തി. സാങ്കേതികവിദ്യയുടെ വളർച്ചയ്ക്കനുസരിച്ച് വിദ്യാർത്ഥികൾ സാമ്പത്തിക, ഡിജിറ്റൽ മേഖലകളിലെ അറിവ് വികസിപ്പിക്കേണ്ടതിന്റെ ആവശ്യകതയും അദ്ദേഹം വ്യക്തമാക്കി.
കൊമേഴ്‌സ് വിഭാഗം മേധാവി ബോബി സൈമൺ സ്വാഗതം ആശംസിച്ചു. കോളേജ് വൈസ് പ്രിൻസിപ്പൽ റവ. ഡോ. സാൽവിൻ തോമസ് കാപ്പിലിപ്പറമ്പിൽ ചടങ്ങിൽ ആശംസകൾ നേർന്നു. കൊമേഴ്‌സ് ഫോറം ഡയറക്ടറും പരിപാടിയുടെ കൺവീനറുമായ ഡോ. ബിനോയ് ചാക്കോ പരിപാടികൾക്ക് നേതൃത്വം നൽകി. കൊമേഴ്‌സ് വിഭാഗം അധ്യാപകൻ അലൻ ജോർജ് നന്ദി രേഖപ്പെടുത്തി.
വിദ്യാർത്ഥികളുടെ സർഗാത്മകതയും പ്രതിഭയും പ്രോത്സാഹിപ്പിക്കുന്നതിനായി ഉദ്ഘാടനച്ചടങ്ങിന് ശേഷം വിദ്യാർത്ഥികളുടെ കലാപരിപാടികൾ ഉൾപ്പെടുത്തിക്കൊണ്ട് ‘ടാലന്റ് ഡേ’ (Talent Day) ആഘോഷങ്ങളും സംഘടിപ്പിച്ചു.
